أخبار وطنية شاب تونسي يصرخ: "هات اقنع واحد عمرو 20 سنة بمستقبلو في تونس .. تو نقنعلك مايا القصوري بش تلبس نقاب ..."
نشر مواطن تونسي اصدارا فايسبوكيا على صفحته الخاصة تحدث فيه بأسلوب تهكمي وساخر على مسألة الضرائب في تونس، قائلا "هات اقنع واحد عمرو 20 سنة بمستقبلو في تونس .. تو نقنعلك مايا القصوري بش تلبس نقاب"
وهذا ما نشره المواطن كمال:
"الشهاري متاع التشاد و الضرائب متاع امريكا يا دين الزح ... و لاخر ينظر عالوطنية ..
عاملين قانون مالية تقول خناجر في قلوب الناس .. الدينار عاطي ظهرو للاورو .. و الاخرى مهبطة شيشة ب 18 د في اللاك و تقلك برا ربي النعجات .. لا خليتو لعباد تعيش في البلاد و لا خليتوهم يهجو ... لا عدلتو في المحاكم و لا في القباضة و لا في الانتدابات ..
دوسيات فساد بالاف المليارات مسيبينهم و تتبعو في حانوت عطار عالاداءات .. ما عندوش باك و يخدم كادر في الوزارة و تلقاه بلحوحو بش يخرج في حملات يزي مالانتداب في الوظيفة العمومية ...
قسما برب الكعبة نعرف شكون حضر في عرس ولد مدير بانكة .. دربك و شطح و حفل العرس .. صبح نهار الاثنين يخدم في احد البنوك ..
مديرين مسامر مخززة في الايتاتيك ... و وحوش متاع تحرش جنسي و استغلال في البريفي ..
رجال بصغارها ... تخدم كالبهايم نهار وليل .. يجيوهم قبل الترسيم ... قبل ما يتسكرو ال4 سنين بجمعة يا بوقلب .. و يقولولهم بسلامة .. و عاود جيب واحد sivp .. ركب عليه البردعة و ارميلو 350 د و اعطيه خدمة 12 فرطاس في الايتاتيك و ما فيها باس في كل مرة توريه الامتعاض متاعك مالانتاجية متاعو ... تي هاو علاش الناس مقهورة و تحب تحرق ...
تي هوما المتخرجين من شعبة الطب يا بوقلب .. ماكش غني ما تحلمش بش تحل كابينة ...
تزيدو الشهاري 6% بالمذلة ... و من غادي توحل في الضوء ووالماء و الضرائب و الغاز و الايسونس ..
تي هات اقنع واحد عمرو 20 سنة بمستقبلو في تونس .. تو نقنعلك مايا القصوري بش تلبس نقاب ..."
